Fashion designer gipatay sa kapuyo

CEBU, Philippines - Patay ang usa ka inilang fashion designer dihang gipusil kini sa ulo sa iyahang kapuyong Australian national diha sa ikaduhang andana sa ilang balay ug pagkahuman nagpusil sa iyang kaugalingon ang maong langyaw diha sa garahian.

Ang insidente nahitabo diha sa 13th Street Agro Macro Subdivision sa barangay Cabancalan, dakbayan sa Mandaue alas-9 pasado ang takna sa miaging gabii diin ang namatay mao si Joy Bernaldez.

Samtang ang suspek nga usa ka Australyano nga gituohang naghikog usab mao si Joseph Cardona, 53.

Si SPO4 Fernando Gabutero, imbestigador sa Presinto 4 sa Mandaue City Police Office (MCPO) nga nahinabi sa Banat News miingon ang gwardiya sa subdivision nga si Eldie Lebradill maoy mipahibalo kanila sa nahitabo.

Si Inspector Ramil Morpos, deputy chief sa Investigation and Detective Management Branch sa MCPO miingon nga ang duha ka mga katabang sa mga biktima mitug-an kanila nga alas- 7 pasado pa sa gabii ilang namatikdang nag-away ang managkapuyo.

Dugang pa niya nga taliwala sa mainitong panaglalis daling misaka sa ikaduhang andana si Cardona nga gisundan sa biktimang si Bernaldez apan paglabay sa pipila ka gutlo nadungog nalang nila ang lanog nga buto sa armas.

Pagkataudtaod nakit-an nila ang agalong lalaki nga mikanaog ug nangita sa anak ni Bernaldez sa unang bana apan ang bata kinsa nakabantay na sa panag-away sa duha daling nakadagan paglikay sa suspek.

Dihang wala makit-i ang bata giingong misulod ang langyaw sa garahian ug kalit lang nadungog nila ang buto sa armas. Human molinaw ang panimalay migawas sa ilang gikahimutangan ang duha ka katabang ug misusi sa gikahimutangan sa maong langyaw ug mao nalay ilang nakita nga nagbuy-od na kini ug wala nay kinabuhi.

Sumala pa sa mga report usa ka kalibre .22 nga armas ang nakuha diha sa garahian diin gituohang nagpakamatay si Cardona.

Si Bernaldez usa ka sikat nga fashion designer dinhi sa Sugbu ingon man sa tibuok nasud tungod sa mga maanindot niining mga bridal gowns ug uban pa.

Ang ig-agaw ni Bernaldez nga si June-Marie Dosdos kinsa maoy mibarog isip tigpamaba sa pamilya kabahin sa nahitabo sa gipadalang e-mail dinhi sa Banat News mihangyo ang pamilya sa publiko og pagsabot ug respeto sa ilang pagbangutan karong mga panahona.

“We would like to request for the community’s kind understanding and respect for our wishes of privacy as we grieve and try to come to terms with the loss of our beloved mother. We are in full cooperation with the authorities and have provided them with our statements. We will continue to work with them as they continue to bring closure to this matter,” matud pa sa pamahayag.

Nagpasalamat usab ang banay’ng Bernaldez sa mga tawong mipadangat sa ilang pahasubo ug mitabang sa ilang kahimtang karon.

Ang haya ni Bernaldez anaa karon sa Cosmopolitan basement chapel sa Nivel Hills, barangay Lahug ug gikatakdang ilubong kini karong adlaw’ng Biyernes sa petsa 23 apan wala pa ibutyag kung asa kini ilubong ug unsang orasa. (EIM)(BANAT NEWS)