Drug addict ipasiguro sa PhilHealth

CEBU, Philippines - Gitun-an na karon ang sugyot nga ilakip sa coverage sa Philippine Health Insurance Corp. (PhilHealth) ang mga drug addict nga anaa sa sulod sa mga rehabilitation center   aron mapalig-on ang kampanya pagsumpo sa suliran sa gidiling druga.

Ang usa ka balaodnon kalabot niini gipangamahan ni Senador Vicente Sotto III   kansang tumong nga ang Senate Bill. No. 44   maoy i-amendar sa Akta Republika 7875 nga gitawag nga PhilHealth Law.

Nunot niini gihangop ni kanhi Dangerous Drugs Board Undersecretary Paul Clarence Oaminal ang maong lakang sa senador   sa tuyo nga masulbad ang nag-unang suliran sa drugas dinhi sa nasud.

Gibutyag ni Oaminal nga   sa pagkakaron kulang gyud kaayo ang mga drug rehabilitation center ug gawas pa daghan usab ang mga pamilya nga di makaabot sa kamahal sa pagpa-rehab sa ilang mga kabanay nga magumon sa bisyo sa paggamit og gidiling   drugas.

Basi sa gihimong survey niadtong 2008 adunay gibana-banang 1.7 ka milyon ang tigamitan og gidiling drugas apan nasuta nga 3000 lang niini ang napaubos sa drug rehabilitation.

Alang kang Oaminal nga kun mapaminus ang mga drug dependent dako usab ang higayon nga makunhod ang suliran sa drugas tungod kay magkagamay naman ang konsumidor niini.

Dugang gipasabot ni Oaminal nga giduso kining maong balaodnon human makita ni Senador Sotto nga ang suliran sa kalisud sa panginabuhi maoy nag- unang hinungdan nga dili makasugakod sa pagpa -rehab ang mga kabanay sa nagumon sa drugas.

Giawhag usab ni Sotto ang mga Sugboanong anti drug crusader ug ang mga local government unit LGU, Non Government Organization (NGO) lakip na kadtong pribadong institusyon sa pagduso og resolusyon ngadto sa kongreso ug sa office of the president aron suportahan nga maaprobahan ang maong balaodnon. (BANATNEWS)