Airtime sa City Hall di mangatake

CEBU, Philippines - Giklaro ni Mayor Michael Rama nga wala nila i-renew ang kontrata sa airtime nga gibayran sa kagamhanan sa dakbayan sa Sugbo   sa DyRF Radyo Puwersa aron pagpangatake sa mga kritiko sa mayor.

Kini agi og tubag ni Mayor Rama sa mga pagduda sa iyang kritiko nga latigohon sa maong programa sa radyo ang mga miyembro sa konseho nga kanunay’ng misupak sa mga plano sa mayor alang sa kaayohan sa siyudad.

Miingon si Rama nga di mahimo nga atakehon sa maong programa ang kinsa mang mga opisyal sa kagamhanan sa dakbayan ilabi na ang mga sakop sa konseho sa Sugbo nga miabag sa iyang buhatan aron    makab-ot ang iyang mga mithi nga maayong kaugmaon sa mga Sugboanon.

Kini tungod kay di ma-renew ang kontrato sa maong airtimer kun way pagtugot sa konseho sa siyudad.

Nagkanayon ang mayor nga ang pag-promote lang sa mga maayong programa sa Siyudad sa Sugbo ang madunggan sa programang Banat Sugbo nga mabati matag hapon sa nahisgutang istasyon nga gidumala nila ni Arnel Bacalan ug Toni Avila.

Kahinumdoman nga ming-uyon ang konseho sa maong programa apan nangita lang sila og tataw nga guidelines niini human nila masayri nga adunay usa ka higayon nga gilatigo og pagsaway si Bise Mayor Joy Augustus Young.

Nasayran hinuon ni Rama nga dili diay ang mga announcer maoy miatake sa bise mayor kundi ang usa ka tawo nga gi-interview sa mga anchorman maoy miatake kang Young nga lisud kaayong makontrolar sa mga magdumala sa programa.

Ang siyudad nagbayad sa DYRF og P141,600 matag buwan ug naaprobahan na sa konseho ang kontrata niini.

Subli hinuon nga gimandoan ni Rama ang mga nagdumala sa nahisgutang programa nga dili gyud mangatake sanglit ang tumong niini mao nga masayod ang mga tawo sa mga programa sa siyudad sa Sugbo. 

Matud pa ni Rama nga angayan nga masayod ang katawhan kung unsa nga mga serbisyo ang gidalit sa iyang administrasyon alang sa ilang mga konstituwente. (BANATNEWS)