CEBU, Philippines - Patay ang usa ka 10-anyos nga batang lalaki human kini madat-ugi sa nabali nga punoan sa buli diha sa barangay Cubacob sa dakbayan sa Mandaue atol sa pagkusokuso sa bagyong Sendong sa milabay’ng gabii.
Ang biktima mao si Antonio Cortes Jr. 10, residente sa maong dapit ug lumad nga taga Malabon, Metro Manila, usa ka tinun-an sa elementarya.
Nasayran sa Banat News gikan ni Cecil Cortes (inahan sa biktima) mga alas 6:00 sa milabay’ng gabii samtang nagpahulay sila sulod sa ilang panimalay kalit nga mihaguros ang kusog nga hangin ug pipila ka gutlo kalit lamang mipaka ang atop sa ilang balay ug misunod og kahagsa ang punoan sa buli nga midat-og sa iyang anak nga niadtong tungora natulog.
Gumikan sa kadako sa maong kahoy naguba ang panimalay nga gipanag-iya ni Amselma Mariquit nga giabangan sa pamilyang Cortes.
Naglisod ang mga rescuers pagputol sa maong kahoy apan dangtan pila ka minutos nakuha ra ang bata ug gidala sa Mandaue City Hospital apan gideklarar kini nga patay nang miabot sa tambalanan.
Swerte nalang nga ang igsuon niini nga anaa sa duyan naputol ang pisi niini ug wala kini maigo sa maong kahoy nga nahagsa.
Gibanabana nga moabot sa napu ka andana ang gitas-on sa maong kahoy nga naputol og katulo tungod sa pagkahagsa.
Gumikan niini gihangyo sa mga residente sa maong dapit ang barangay kapitan nga si Edgar Bihag nga ipaputol na ang tanang punoan sa buli sa maong dapit aron dili na kini makadisgrasya og laing kinabuhi.
Dili palang dugay duha usab ka kinabuhi ang nakalas dihang usa ka susamang punoan ang natumba diha sa barangay Labogon sa mao gihapong siyudad. (BANATNEWS)