CEBU, Philippines - Nagmaya ang mga kawani sa Kapitolyo human sila pahibaw-a ni Gobernador Gwendolyn Garcia nga hatagan sila og tag P20,000 cash ug tag-usa ka sakong bugas nga Christmas bonus ang matag usa kanila atol sa ilang Christmas party niadtong Huwebes sa hapon.
Matud pa sa gobernador nga gibase sa performance sa matag kawani ang gidak-on sa bonus nga gihatag kanila.
Ang maong bonus sama gihapon sa miaging tuig nga pareho og nadawat ang tanang kawani sa matag departamento sa Kapitolyo.
Hinuon niining tuiga nasayran sa gobernador nga “satisfactory” kun makapatagbaw kaayo ang serbisyo nga gihatag sa matag kawani base sa mga destino nga gitahas kanila.
Ang Christmas party gisugdan sa alas 2:00 sa hapon diin ang matag departamento mipasundayag sa tagsa-tagsa nila ka salmot sa paghatag og kaalegre sa maong party. (BANAT NEWS)