Pusher dakpan sa simbahan
HILONGOS LEYTE, Philippines – Usa ka gikatahapang namaligya og shabu nadakpan sulod sa compound sa simbahan ning lungsod.
Si Rene Faller, lumad nga taga barangay Matapay, Hilongos, Leyte, wala na makaikyas sa dihang nalipat siya sa pulis nga nagtakubang poseur buyer.
Kuyog ang asset, si PO1 Welito John Braca mipalit sa ginadiling drugas gamit ang mga marked money nga P500 ug duha ka tag-P50. Human makompleto ang transaksyon tali ni Faller ug sa pulis, gidakop dayon kini sa mga nagtago lang nga kaubanan sa naulahi.
Matud ni Chief Inspector Ramil Amodia sa dihang gihinabi sa Banat News, si Faller gipasakaan na sa kasong paglapas sa section 5 ug section 11 sa illegal nga drugas ubos sa Akta Republika 9165 pinaagi sa inquest proceedings.
Ang mga drugas nga nasakmit gibana-bana ni Amodia nga mokantidad og P8,000 pataas. Ang usa ka posporo nga gidudahang shabu gikatakdang ipailawom sa eksaminasyon sa laboratoryo sa kapolisan.
Ang kaso ni Faller nga gipasaka na niadtong Disyembre 13 mao ang ikaduhang higayon sulod ning semanaha nga nagmalampuson ang mga kapolisan sa kampanya batok ilegal nga droga.
“Gipangunayan gyud ni namo uban sa akong deputy nga si Insp. Clark Chavarria aron hingpit gyud nga matuman ang sugo ni Mayor Jose Emery Roble,” matud ni Amodia.(/EIM)(BANAT NEWS)
- Latest
- Trending
