Misa de Gallo gihugopan

CEBU, Philippines - Gihugopan sa mga Romano Katoliko ang tanang simbahan sa Sugbu nunot sa tradisyonal nga Misa de Gallo nga nagsugod kagahapon sa kaadlawon nga gihulagway sa Archdiocese of Cebu nga malampuson.

Kagahapon mao ang una sa siyam ka serye sa mga Santos nga Misa nga tradisyonal nang gibuhat sa mga katoliko isip sugat sa pag-abot sa adlaw’ng natawhan ni Hesu Kristo.

Sa pakighinabi sa Banat News, si Msgr. Esteban Binghay, Episcopal vicar sa Archdiocese of Cebu nagkanayon nga sama sa ilang gilauman, bagang duot sa mga manimbahay ang mihugop sa nagkadaiyang simbahan dinhi sa Sugbo.

 “Over-all successful ang first day sa Misa De Gallo. Mismo ako nagmisa didto sa usa ka barangay didto sa Minglanilla nakita nako ang kadaghan sa tawo diin ang uban didto na sa gawas sa simbahan maglingkod,” matud pang Binghay.

Apan si Binghay mitug-an nga mao gyud kini ang sagad nga mahitabo sa unang misa magpunsisok ang mga tawo ug sa kadugayan magkagamay nalang.

 “Daghan basta first day kay for good luck man na alang sa mga Katoliko, pero in the succeeding days mogamay dyutay. Kasagaran gyud sa first ug sa final day sa Simbang Gabi ang pinakadaghan,” pasabot pa niini.

‘Generally peaceful’ mao kini ang giluwatang pamahayag ni Sr. Supt. Melvin Ramon Buenafe, hepe sa Cebu City Police Office (CCPO) sa unang adlaw sa Misa de Gallo kagahapong adlawa.

Ang 190 ka mga Field Training Police (FTP) ug laing 25 ka regular members sa PNP nga gidugang sa Police Regional Office-7 ngadto sa CCPO maoy gipakatap ni Buenafe sa mga simbahan ug uban pang mga lugar nga walay mga suga nga diin agianan sa mga tawong paingon mosimba.

Giawhag ni Buenafe ang katawhan nga dili magsul-ob og alahas kun mosimba ug gipasidan-an kabahin sa mga kawatang manglungkab sa kabalayan.

Sa dakbayan sa Lapulapu gibanabanang 12mil ka mga tawo ang nanimba diha sa Our Lady of the Rule National Shrine diin gihimug-atan sa kora paroko nga si Fr. Jaime Duero sa iyang wali ang kamahinungdanon sa paghigugmaay ug paghinatagay sa tanan. (BANAT NEWS)