Vendors sa private market sa tabunok di na patindahon

CEBU, Philippines - Mga vendors sa pribadong merkado sa Tabunok, dakbayan sa Talisay di na patindahon tungod sa giingong mga kalapasan sa tag-iya niini sulod sa pipila na ka tuig ug gihatagan nalang kutob karong Disyembre 31, 2011 nga makapaninda sa maong merkado.

Si Arturo Bas, public information officer (PIO) sa siyudad sa pakighinabi niini sa Banat News kagahapon mibutyag nga si city administrator Richel Bacaltos duna nay giandam nga notisya alang sa mga vendors sa nahisgutang merkado.

Hinuon posibleng dunay mahibilin nga vendors diha sa maong merkado apan kadto lang wala maninda og mga bugas, karne, isda ug mga utanon.

Kahinumduman nga ang pamilyang Nacario miduso og reklamo ngadto sa korte tungod sa giingong dili makiangayong pagpahunong sa siyudad sa ilang negosyo.

Apan matud ni Bas nga ang pamilyang Nacario sulod sa unom ka tuig nagbaton lang og lisensiya sa ilang negosyo nga pagpaabang og pwesto apan walay mga business permits ang mga naninda sa maong merkado.

Ang mga mapapahawang vendor diha sa pribadong merkado hatagan og pwesto sa siyudad ngadto sa bag-ong merkado sa Lagtang.

Apan kahinumduman usab nga ang mga vendor ngadto sa Lagtang ang mireklamo nga apektado ang ilang panginabuhian tungod sa kahinay sa ilang halin ngadto sa maong merkado tungod kay gamay ra ang mga tawong manuyo og adto didto aron mangompra. (BANAT NEWS)