Firecracker zone sa Lapulapu buksan karon

CEBU, Philippines - Hingpit nang buksan karong adlawa ang firecracker zones sa barangay Babag hangtud na sa barangay Canjulao sa utlanan sa lungsod sa Cordova karong adlawa diin iladlad ang mga baligyang mga pabuto.

Sumala pa adunay kapin sa 100 ka vendors ang maninda sugod karong adlawa, Biyernes, petsa 16 hangtod sa 31 ning bulana nga nakakuha og permiso ug lisensya pagbaligya niini.

Si SFO4 Rodrigo Igot Jr., sa Bureau of Fire Protection (BFP) sa maong dakbayan nga nahinabi sa Banat News miingon nga naandan nang firecracker zone area ang maong mga dapit.

Adunay inspeksyon nga himuon ang BFP diha sa mga stalls aron pagtino kung nisunod ba sila sa mga rekisitos sa seguridad ug kaluwasan sa publiko sama sa pagpundo og tubig ug bala ug saktong distansya sa matag stall.

Gidili usab ang pag-testing sa mga pabuto, gidili ang pagpanigarilyo ug uban pang matang sa pagluto.

Aron mapahibalo ang tanan adunay ibutang nga dakong karatula nga nagpahimangno sa mga tawo nga molabay sa maong lugar paingon sa lungsod sa Cordova nga kini ‘firecracker zone area’ ug ‘no smoking.’ (BANAT NEWS)