Nagbuak og ice gipusil sa ulo patay

CEBU, Philippines - Patay diha-diha ang usa ka delivery boy human kini gipusil sayo sa miaging gabii sa may Taboan Public Market B. Aranas St . , sa barangay San Nicolas siyudad sa Sugbu.

Ang gipusil ug namatay giila sa kapulisan nga mao si Roel Dandan, 28, delivery boy sa Taboan Ice Dealer nga nahimutang sa Taboan public market.

Si SPO4 Alex Dacua sa Homicide Section sa Cebu City Police Office (CCPO) nagkanayon nga samtang nagbuak og ice ang biktima sa gawas nga bahin sa iyang gitrabahoan kalit lang miabot sa tungod sa biktima ang usa ka motorsiklo nga gisakyan sa duha ka tawo ug nanaog ang angkas niini dayon pusil sa ulo niini.

Ang biktimang si Dandan nahagba diha dayon samtang ang mamumuno mibalik sa motorsiklo ug ang drayber mipasirit dayon palayo sa lugar.

Sumala pa sa kapulisan nga mitug-an kanila ang igsuon sa biktima nga dugay na nilang gitambagan ang naulahi nga dili na mokuyog sa iyang mga barkadang badlungon apan wala gyud mopatuo.

Gisusi karon sa kapolisan ang background sa biktima sanglit walay nakaila sa duha ka armadong lalaki nga pulos nagtaptap sa ilang nawong. (BANAT NEWS)