Way interesadong maninda og pabuto

CEBU, Philippines - Daw nawad-an na og kadasig sa pagpamaligya og pabuto ang mga manindahay sa dakbayan sa Mandaue nunot usab sa tinguha sa Bureau of Fire Protection (BFP) nga ilang ipatuman sa tibuok dakbayan karong tuiga ang “total ban” sa pagpamaligya niini.

Si Mandaue City Fire Marshall Rogelio Bongabong nga nahinabi sa Banat News miingon nga sukad sa unang adlaw sa bulan sa Disyembre karong tuiga wala sila makamatikod nga adunay mibisita sa ilang buhatan nga mao ang pagkuha og permit alang sa pagpamaligya og pabuto.

Matud pa ni Fire Chief Inspector Bongabong nga sukwahi kaayo kini sa miaging mga tuig nga naghinapos pa ang bulan sa Nobiyembre daghan na sa mga manindahay ang mokuha og permit sa ilang buhatan.

Giklaro ni Bongabong nga bisan pa kun hangtod niining panahona iyang gipaabot ang tubag sa konseho sa dakbayan nga hingpit na lamang i- ban ang firecrackers sa dakbayan.

Giklaro ni Bongabong ug kun nahitabo man usab nga adunay mokuha og permit sa ilang buhatan ilaha nalang balibaran kay wala man usab sila makakita og lugar nga ilang ideklarar nga firecracker zone area.

Hinuon si Bongabong mipasabot nga gitugot lamang nila sa kabomberohan ang pagpamaligya niini diha sa mga malls tungod kay gawas nga giimpake atua usab kini ibaligya sa sulod sa mga mall nga no smoking area.

Duha ka tuig na ang nakalabay dihang unom ka tawo ang nakalas sa Mandaue dihang kalit nga mibusikad ang gipamaligyang pabuto. (/EIM)(BANAT NEWS)