CEBU, Philippines - Patay ang usa ka drayber human kini gi-ambusan sa duha ka mga lalaki ug gipusil makadaghang higayun samtang padulong untang maghatud sa anak sa iyang agalong car dealer luwan sa usa ka awto diha sa Marian Village sa barangay road sa Tayud lungsod sa Consolacion kagahapon sa alas 6:15 sa buntag.
Patay dihadiha human mabulit og bala ang lawas si Joel Hellasgo, 40, nagpuyo sa maong lugar ug private driver sa usa ka car dealer nga si Leben Tubongbanwa samtang ang napagan mao si Regenald Loy,15,nagpuyo sa maong lugar ug tinun-an sa high school.
Samtang ang 10-anyos nga anak sa agalon sa biktima nga iyaha unta ihatud sa eskuylahan swerteng wala maigo sa pagpamusil sa duha ka mga lalaking sakay og motor nga nag-angkasay ug mibabag sa Toyota Vios nga gisakyan sa mga biktima.
Matud ni PO2 Roosevelt Matoug sa Consolacion Police Station dihang nahinabi sa Banat News dili pa kaayo layo sa gate sa balay sa agalon ni Hellasgo ang sakyanan dihang kalit kini nga gibabagan sa mga kriminal ug gipaulanan og bala.
Nakaangkon og di muminos unom ka samad pinusilan sa kalawasan ang biktima ug namatay dihadiha samtang luwas ang pasahero niini apan way swerteng napagan sa agtang ang 15-anyos nga naatol nga miagi sa dapit. Sa report sa Baliang Bisdak kagahapon gisusi na ni Chief Insp. Wilbert Parilla kung agalon sa biktima o ang naulahi ang direktang target sa mga mamumuno. (BANAT NEWS)