Bag-ong panganak gibiyaan

CEBU, Philippines - Pasko karong mga panahona nga diin ang mga bata mabuhong sa pagmahal sa ilang mga ginikanan tungod sa pagsaulog sa adlaw’mg natawhan sa Manunubos, apan sukwahi kining nahitabo sa usa ka puya nga bag-ohay pang gianak ug gi-abandonar dayon sa inahan niini.

Swerte nalang napunitan kini sa duha ka mga babayeng nag-jogging ug nakamatikod sa bata diha sa police outpost sa Don Gil. Garcia St. barangay Poblacion sa lungsod sa Argao kagahapon sa alas 5:30 sa buntag. Matud ni PO2 Benjamin Gerozaga sa Argao Police Station dihang nahinabi sa Banat News,usa sa mga joggers nga si Jackielyn Gil mitug-an nakakita sila og usa ka babayeng nag-estambay sa maong outpost dihang una nila kining naagian.

Apan sa ilang paglabay ug pagbalik sa agi wala na diha ang maong babaye ug wala lang nila kini panumbalinga.

Dangtan og pipila ka tikang saylo sa police outpost nakadungog sila og hilak sa bata hinungdan nga mibalik ang duha ka joggers sa ilang agi ug gisusi diin gikan ang hilak sa bata.

Nakurat nalang sila nga adunay pinutos og lampin nga naglihok-lihok ug naghilak sa bangko sa maong outpost nga niadtong tungora walay nagbantay ug sa ilang         paghiling bag-o pa gyud kini gipanganak.

Dihang ilang gisusi nakit-an nila ang puya nga babaye nga bag-ohay pa gyud nga gipanganak tungod kay naa pa kini pusod nga wala mabugkos ug giputos og lampin unya gitungtong sa bangko sulod sa maong outpost.

Matud pa aduna pay mga sininang adunay mga dugo kauban sa maong bata.

Dali nilang gitawgan ang kapulisan ug gihatud ang puya sa district hospital sa Argao aron ma check up ug human masigurong himsog ug luwas na kini gidala kini ngadto sa Department of Social Welfare and Development.

Bisan wala na maglaom pang adunay mo-claim sa bata, ang mga awtoridad padayong nagpaabot mag-usab ang huna-huna sa inahan nga mokuha niini o ba kaha ang posibilidad nga kini ipagalam sa magtiayong walay anak.

Si PO3 Elizer Canada sa Argao Police Station mitug-an sa Banat News nga ini og kagabii walay polis nga magbantay sa maong dapit sanglit mingaw naman kini nianang mga orasa.

Ang kapulisan nagtuong dili taga lungsod sa Argao ang inahan sa maong puya.(/EIM)(BANAT NEWS)