CEBU, Philippines - Ang mga sakop sa Bloods gang maoy suspetsado sa kamatayon sa usa ka drayber sa habal-habal nga gipusil sa miaging kaadlawon didto sa PUJ terminal sa barangay Cansaga, lungsod sa Consolacion.
Si PO3 Alin Garciano sa Consolacion Police Station miila sa biktima nga mao si Dioscoro Rico Jr., 32 , ulitawo ug nagpuyo sa barangay Tulo-Tulo sa nahisgotang lungsod.
Matud pa ni PO3 Garciano nga namasahero ang biktima sa gimaneho niyang habalhabal ug naghatod kini og pasahero sa PUJ terminal sa maong dapit.
Sa pagkanaug sa iyang pasahero kalit lang usab nga mitumaw ang usa ka wala hiilhing batan-ong lalaki dayong pusil sa biktima.
Si PO3 Garciano miingon nga gihulagway sa pipila ka mga tawo sa maong dapit nga yapison ang panglawas sa maong lalaki nga gibana-banang anaa sa 20 kapin ang panuigon, kulong ang taas niining buhok ug nagsul-ob og puti nga t-shirt.
Ang biktima nga naigo sa ulo namatay diha-diha ug ang wala hiilhing mamumuno dali usab nga nakasibat pahilayo sa maong dapit.
Matud pa ni PO3 Garciano nga sa ilang pakisusi sa mga kauban nga drayber sa habal-habal nga nakasaksi, mibutyag nga gikalalis sa biktima ang grupo sa mga batan-ong lalaki nga sakop sa Bloods gang sa wala pa ang hitabo.
Dako ang ilang pagtuo nga ang maong grupo maoy mipatay sa biktima.
Padayong gipangita sa kapolisan ang mga kriminal. - BANAT NEWS