Buhis sa Naga padak-an

CEBU, Philippines - Gitinguha sa dakbayan sa Naga nga mosaka og 50 porsento ang ilang buhis   sa umaabot nga tuig.

Kini pinaagi sa maayong sistema sa pangolekta sa buhis o kaha ang pagpasaka usab sa buluhisan, matud pa ni City Administrator Arthur Villamor.

Matud pa niya nga ning maong sistema dako kaayo og kalagmitan nga   ang unang apektohan niini mao ang gitawag nga “regular fees” sama sa mga permit ug uban pang buhisanan.

Hinuon ang real property tax (RPT) usa sa dili mahimong kapasakaan og buhis tungod kay ubos pa kini sa 10-year moratorium sukad niadtong tuig 2007 dihang ang Naga nahimong siyudad.

“Since dugay na na-amend ang Revenue Code sa Naga, it’s time na nga usbon kini. Barato ra man pud kaayo, mga 50 percent ra,” ni Villamor pa.

Matud ni Villamor nga adunay mga bayranan nga magkantidad lang og P13 ug P33 sa police clearance ug kung pasakaan kini ngadto sa 50 porsento dili na kini makadaot sa mga Naganhon.

 Niining tuiga mikabat sa P100 milyones ang natigom nga buhis sa siyudad ug gilauman nga sa sunod tuig modoble pa kini tungod sa operasyon sa Kepco-Salcon Power Corporation.

Ang buhis nga matigom sa panudlanan sa siyudad sa sunod tuig gilauman nga mapun-an og P120 milyones.

Si Villamor midugang nga ang iyang team naggama na karon og draft sa kausaban sa Revenue Code sa Naga.  - BANAT NEWS