CEBU, Philippines - Nasikop ang usa ka suspetsadong tulisan atol sa gipahigayong checkpoint sa kapolisan ug sa mga miyembro sa Talisay City Intelligence Bureau (TCIB) sa Cebu South Coastal Road habig sa sitio Kimba, barangay San Roque, dakbayan sa Talisay kagahapon sa kaadlawon.
Ang nasikop mao si Ronielan Tabal, 20, taga sitio Cabancalan I, barangay Bulacao, dakbayan sa Sugbo.Naimbargo ni PO1 Edwin Campomanes ug sa mga miyembro sa TCIB ang usa ka kalibre .38 revolver nga dunay tulo ka buhing bala gikan kang Tabal.
Sa natala sa blotter sa kapolisan si Campomanes uban sa mga TCIB nagpatrolya sa kadalanan sa maong lugar dihang nabantayan nila ang duha ka lalaki nga nagsakay og Honda nga motorsiklo, kolor itom ug nagtangag sa plakang GT-2890 nga kadudahan og mga lihok.
Gipara sa grupo ni Campomanes ang maong mga lalaki aron hilngon ang mga dokumento sa motorsiklo nga gisakyan niini apan giingong ang duha milikay ug mipasutoy og padagan sa motorsiklo.
Giingong ang angkas niini naggunit na og pusil samtang gigukod sa kapolisan ug tungod sa kakusog sa ilang dagan nalimbuwad kini sa karsada.
Si Tabal kinsa wala makabangon dayon maoy nakuptan nila ni Campomanes apan ang iyang angkas nakaikyas gyud
Base usab sa blotter sa kapolisan nga si Tabal miangkon nga nalambigit siya sa mga milabay’ng insidente sa tulis.
Usa sa mga nahitabong tulis nga iyang nalambigitan mao ang tulis niadtong Nobiyembre 11, 2011 sa alas 11:30 sa buntag sa barangay Candulawan, dakbayan sa Talisay.
Ang iyang kauban sa maong pagpanulis nga si Charlie Briones nasikop sa mga polis.
Si Tabal nagkagulkol karon sa prisohan. - BANAT NEWS