CEBU, Philippines - Kapin sa napulo ka oras nga naglangoy sa kadagatan gikan sa lungsod sa Calape, lalawigan sa Bohol una pa mabangali sa barge kagahapon sa kaadlawon sa habig na sa lungsod sa Argao, ning lalawigan sa Sugbo ang usa ka lalaking giingong nalisoan sa maayong pangisip.
Si Faustino Berino Jr., hingkod, ulitawo, lumad nga taga Pananganan Island, Calape, Bohol nasigpatan sa mga tripolante sa barge nga LCT de Bohol samtang naglangoy kini sa dagat.
Sumala sa taho sa kapolisan sa Argao nga gikan sa pantalan sa lungsod sa Loon, Bohol ang nahisgutang barge nagpaingon sa pantalan sa barangay Tal-ot, lungsod sa Argao dihang ilang nabangalan si Berino. Diha-diha ila kining giluwas pinaagi sa pagpasakay sa ilang barge ug ilang gihatud ngadto sa buhatan sa Philippine Coast Guard nga nagbase sa Tal-ot.
Kagahapon sa alas 9:45 sa buntag gitunol na usab kini sa taga Coast Guard ngadto sa kapolisan hinungdan nga gidali dayon kini paghatod ngadto sa Vicente Sotto Memorial Medical Center (VSMMC) aron mahiling sa mga mananambal ang kahimtang sa iyang panglawas .
Si PO2 Benjamin Lerosaga sa Argao Police Station dihang nahinabi sa Banat News nagkanayon nga human i- turn over sa Coast Guard si Berino ngadto kanila ilaha kining gisukit-sukit ug mitug-an sa iyang pinuy-anan ingon man ang ngalan sa amahan niini.
Apan sumala pa ni Lerosaga nga usahay molikoy ang tinubagan ni Berino hinungdan nga nagtuo silang aduna kini gamay nga deperensya sa iyang pangisip.
Nakig-alayon dayon sila sa kapolisan sa Calape hinungdan nga nahiabot dayon dinhi sa Sugbo ang amahan nga si Faustino Berino Sr.
Matud sa amahan nga kalit lang nga midagan ang iyang anak sa miaging hapon paingon sa dagat kay matud pa may tawo kuno nga buot mopatay kaniya.
Midugang kini nga adunay mga higayon nga motukar ang sakit sa iyang anak nga nervous breakdown mao nga ila nalang kining gipasagdan.
Apan niadtong higayona wala siya magtuong molahos diay kini paglangoy sa dagat ug nagpasalamat nalang siya sa taga barge, ingon man sa taga Coast Guard ug sa kapolisan nga misagop dayon sa iyang anak. (WC)(BANAT NEWS)