Bag-ong warden sa City Jail maghigpit

CEBU, Philippines -  Ang bag-ong Officer-in-charge sa Cebu City Jail nga si Superintendent Johnson Calub mipahibalo kagahapon nga moumol siya og intelligence team sulod sa maong prisohan nga maoy maniid sa mga kalihukan sulod sa maong bilanggoan.

Kini natigayon human sa migawas nga balitang usa ka drug pusher ang mibutyag sa kapolisan nga ang shabu nga iyang gibaligya gikan sa sulod sa maong prisohan, butang nga gihimakak sa kadagkoan sa maong prisohan.

Nagkanayon si Calub nga istriktuhon nila og maayo ang inspeksyon sa mga dalaw sa piniriso ug mapalapdan kung madugang na ang intelligence team.

Kahinumduman nga hingpit nga milingkod si Calub sa iyang puwesto niadtong Lunes sa hapon isip hulip ni Superintendent Maria Victoria Jimenez.

Nasayran nga usa sa mga rason nga gihulipan si Jimenez isip acting jail warden sa siyudad gumikan sa sunod-sunod na nga pag-eskapo sa pipila ka mga piniriso.

Si Jimenez mo-focus na usab sa iyang trabaho isip administrative chief sa Bureau of Jail Management and Penology (BJMP)-7.

Giingon nga ang buhatan mismo sa BJMP maoy nagmando nga si Calub ang ibutang sa maong bilanggoan.

Nasayran nga nakaserbisyo na si Calub sa Siyudad ug nagsilbi na kini kaniadto isip chief escort niadtong 1996 ngadto sa 1999 sa dihang ang prisohan gitawag pa kaniadto og Bagong Buhay Rehabilitation Center.

Siya usab ang jail warden sa dakbayan sa Talisay sukad tuig 2001 hangtud sa 2010.

Samtang si Mayor Michael Rama naghinam-hinam na nga mahimamat si Calub ug gusto niya nga maminaw sa mga maayong programa niini sulod sa prisohan. (BANAT NEWS)