Ouano mi-deny nga nagpaluyo sa urban poor

CEBU, Philippines -    Hugtanong gipanghimakak ni 6th District Board Member Thadeo Ouano ang mitumaw nga mga alegasyong siya maoy nagpaluyo sa grupo sa urban poor nga misan g-at og reklamo ngadto sa Ombudsman Visayas batok ni Mayor Jonas Cortes.

Si Ouano sa iyang pamahayag sa DYKC niadtong miaging adlaw miingon nga wala siya makaila sa maong grupo sa mga urban poor sanglit bisan usa ka higayon wala man usab siya makahinagbo niini.

Gitataw niya nga kaugalingong kabubut-on sa maong grupo ang mga lakang nga ilang gihimo ug dili tinuod may kalambigitan ang iyang pamilya niini.

Matud pa ni Ouano nga pinili sa katawhan si Cortes isip mayor sa dakbayan ug angay lamang nga suportahan ug hatagan og kahigayonan nga mohimo og mga lakang nga gitumong alang sa gitinguhang kalamboan sa kinabag-an.

“Ato siyang pasagdan, kay ako ug ang akong amahan (kanhi mayor Alfredo Ouano) diha na man gikan ug ang kasaysayan na lang maoy mohukom kun bati ba o maayo ba ko nga mayor sa dakbayan,” matud pang Ouano.

Sa nasayran nga miduso og reklamo ngadto sa Ombudsman ang grupo sa mga urban poor sa Philcadan sa sitio Orel sa barangay Banilad, dakbayan sa Mandaue batok ni Cortes.

Tungod sa planong pagpabalhin kanila sa relocation site nga 6.5 hektaryang luna sa barangay Paknaan nga nasutang gideklarar nga timberland ug gisanapan og tubig ilabi na kun mag-ulan.

Hinuon nabahin ang grupo sa mga urban sanglit daghan man usab ang nakauyon sa tinguha ni Mayor Cortes nga pagbalhin kanila ngadto sa maong lugar. (/EIM)(BANAT NEWS)