Pari gihulga sa text

CEBU, Philippines - Ibalhin na ngadto sa dakbayan sa Mandaue ang assistant parish priest sa lungsod sa Pinamungahan nga nakalalis sa usa ka pulis sulod sa police station,usa ka semana ang nakalabay tungod sa giingong mga hulga nga nadawat niini pinaagi sa text.

 Si Fr. Mark Barneso sa Sta. Monica Parish mitug-an nga alang sa iyang seguridad nakadesider ang iyang mga labaw nga ibalhin siya og laing lugar gumikan sa nadawat niya nga hulga pipila ka adlaw sukad mibuto ang issue ngadto sa mga sakop sa media.

“So far I haven’t received an appointment but ibalhin gyud ko sa Mandaue,” matud pa niya.

Siya misaysay nga human siya nagmisa niadtong alas 5 sa hapon sa Huwebes sa miaging semana, nakadawat dayon siya og mensahe sa iyang cellphone nga nagkanayon “pamutos lang daan pauli sa inyo kay ang kahiubos sangko sa langit.”

Dayon gisundan na sab og laing text message pagka Biyernes sa buntag nga nagkanayon “Buhi pa ka?” Si Barneso aduna nay gikatahapan.

“Ako wa gyud ko kasabot nganong ingon ana ba nga nisulti nako nga dili ko interesado mo-file og kaso kay I know daghan ang maligsan ug naay pamilya nga gutumon,” matud pang Baneso.

Midugang usab siya nga iyahang giingnan si Atty. Julius Ompad, deputy of the Provincial Investigation and Detective Management Branch (PIDMB) nga kun mahimo pahamtangan nalang og gamay’ng silot si Fajardo.

Kahinumduman niadtong Disyembre 3, si Fajardo gipasanginlan nga mipakita’g bati nga batasan ngadto kang Barneso human nasuko kini dihang gipukaw sa pari nga natulog sulod sa police station.

Gani matud pa ni Barneso ngadto ni Ompad nga mikalma ang tingog ni Fajardo dihang mipaila siya sa iyang kaugalingon.

Apan nasuta sa PIDMB ang trouble incident wala ma- record sa police journal kini nagpasabot nga napakyas pagresponde ang kapulisan.

Si Sr. Insp. Leo Logroño, hepe sa Pinamungajan Police Station, miangkon nga niadtong higayona natulog siya sa iyang quarter ug walay mipahibalo kaniya tali sa nahitabo nila ni Fajardo ug Barneso.

Gihulagway ni Barneso nga usa ka character assassination ang gibuhat kaniya hinungdan nga gusto niya nga makab-ot ang tinuoray nga hustisya.

Iya hinuong giklaro ang iyang pagbalhin ngadto sa dakbayan sa Mandaue wala magpasabot nga nahadlok siya inay iya kining himuon nga usa ka pagtulun-an.

Sa pagkakaron si Fajardo nag-atubang na og imbestigasyon sa PIDMB samtang nadestino na siya sa Service Security Group sa Provincial Headquarter human girelibohan siya dayon sa Pinamungahan. (BANAT NEWS)