Bag-ong AFP chief gipasidan-an

CEBU, Philippines - Adunay pahimangno si Presidente Benigno Aquino III ngadto sa bag-ong natudlong Armed Forces of the Philippines chief of staff nga si Lt. Gen. Jessie Dellosa, panalipdan ang mandato sa katawhan.

Ang pahimangno gihimo ni Aquino sa turn-over ceremony diha sa Kampo Aguinaldo kagahapon dihang si outgoing chief Gen. Eduardo Oban miretiro. Masaligon hinuon si Aquino nga maayong lider si Dellosa ug kini mopadayon unya sa mga nasugdang mga maayong programa ug proyekto ni Oban ug labaw sa tanan mapadayon ang gitinguhang reporma sa AFP dungan sa repormang gitinguha sa kasamtangang gobiyerno.

Sa report sa Bomboradyo.com, gipasaligan hinuon ni Aquino ang AFP nga magpadayon ang suporta sa gobiyerno sa ilang panginahanglan sama sa modernong gamit, edukasyon, benepisyo ug trainings aron andam kini pagpanalipod sa katawhan ug sa nasud.

Nagpasalamat usab si Aquino sa maayong pagdumala ni Oban sa AFP sulod sa siyam ka buwan niining liderato sa militar ug gidayeg kini sa pangulo sa pagpabangon niini sa dungog sa AFP nunot sa nagsunod nga mga kontrobersyang mitumaw.

Lakip sa gidayeg ni Aquino nga nahimo ni Oban mao ang pagpatuman niini sa ‘No Conversion Policy,’ transformation roadmap ug ang pagtarong sa sistema sa procurement process ug pagpamalit sa mga gamit sa AFP nga kaniadto naputos og mga pagdudang adunay nakabulsa sa pundo. (BANATNEWS)