Ex-OFW ug 2-anyos natagak sa barko nalumos

Bacolod City, Philippines — Usa ka kanhi overseas Filipino worker (OFW) ang milayat sa nagdagang barko aron unta luwason ang iyang 2-anyos nga anak nga babaye diha sa utlanan sa kadagatan   sa Bacolod ug Talisay niadtong Biyernes, patay ang duha.

Sumala pa ni Philippine Coast Guard-Bacolod chief Lt. Commander Dominador Senador ang nangalumos mao sila si Michelle Tiamsing, 30, ug anak nga si Joemcelle, 2, pulos nagpuyo sa barangay 1 Poblacion sa lungsod sa Ilog sa Negros Occidental.

Gikatahong luwan ang mga biktima sa M/V St. Joseph the Worker nga gipanag-iya sa Negros Navigation          padulong sa Manila atol sa pagkahitabo.

Matud pa ni Senador nga gipahibalo nalang sila sa mga tagdumala sa Negros Navigation nga duha sa ilang pasahero ang nangatagak gikan sa ilang barko gibanabanang 2.7 nautical miles gikan sa baybayon sa Bacolod ug Talisay.

Paglabay sa 30 ka minutos nga pagpangita sa mga rescuers nakuha ang patay’ng lawas sa duha ug gidala sa Bacolod City.

Sumala pa usa ka 17-anyos nga testigo nga wala hinganli sa kapolisan ug sa PCG nagkanayon nakit-an niini ang ginang nga nagkugos sa iyang anak kilid sa barko, matud pa dunay mga pasaherong mibadlong sa maong ginang nga di magpapidpid sa kilid apan wala kini mopatuo.

Pipila ka gutlo ang milabay nadunggan nalang nila ang maong babaye nga nagsinggit-singgit nga nahulog ang iyang anak hinungdan nga gialarma ang crew. Apan samtang nangandam ang crew sa pagluwas sa bata kalit nga milayat si Tiamsing sa dagat. (/EIM)