2 gibunalan pulos patay

CEBU, Philippines - Duha ka mga tawong parehong gidudahang gibunalan sa ulo ang namatay sa managlahing insidente pagpatay sa dakbayan sa Lapulapu ug sa lungsod sa Sibonga kagahapon sa kaadlawon ug niadtong Domingo sa gabii.

Nahimong ‘death day’ ang birthday sa mag-uumang si Alejandro Marangga, 42, nagpuyo sa barangay Banlot lungsod sa Sibonga human gikatahong gibunalbunalan sa kainom niining si Domingo Delos Reyes, 41, samtang nagselebrar.

Matud ni PO2 Arnold Ferenal sa Sibonga Police Station dihang nahinabi sa Banat News subay sa inisyal nga imbestigasyon nga ang biktima diha nagsaulog sa iyang adlaw’ng natawhan sa balay sa usa sa iyang mga higala ug ang suspek usa sa naimbitahan.

Sa tanto nilang inom nangahubog ang managhigala ug diha na mitumaw ang lalis sa biktima ug sa suspek, sa kainit na sa ilang komprontase gikatahong mikuha og sundang ang biktima ug gitigbas ang suspek apan wala maigo.

Apan ang suspek nakapunit og kahoy ug gigamit kini pagsagang sa sundang nga naabot sa ilang panagharong sa kamaisan ug sa tantong warawara sa duha sa sundang ug sa kahoy naigo sa agtang ang biktima.

Pagkatumba sa biktima wala na kini lung-i sa suspek pagpuspos sa ulo hangtud nga namatay ang biktima ug wala na madala pa sa tambalanan.

Human sa hitabo mitahan ang suspek sa mirespondeng opisyales sa barangay ug gi turnover ngadto sa kapulisan alang sa pagpasaka og kaso.

Sa laing bahin, usa ka Ernesto Pagobo, 46, ang napalgang patay kagahapon sa kaadlawon diha sa bakanteng lugar sa sitio Lupa sa barangay Punta Ingano sa dakbayan sa Lapulapu.

Si SPO1 Allan Pantaleon sa Homicide Section sa kapolisan sa maong dakbayan nga nahinabi sa Banat News miingon nga usa ka Rico Banas, nga nagpuyo sa maong dapit maoy nakakaplag sa biktima.

Si Pantaleon miingon nga base sa ilang paghiling posibleng niana pang nakalabay’ng gabii namatay ang biktima ug natahap silang posibleng gibunalan kini og gahi nga butang diha sa ulo tungod sa nakitang dakong hubag sa ulo niini.

Ang kapolisan padayon pang nag-imbestigar sa maong kaso pagtino kung si kinsa ang mamumuno niini. (/EIM)  (BANATNEWS)