CEBU, Philippines - Tulo ka tawo kinsa giingong paingon untang mag-pot session nasikop sa kapolisan didto sa barangay San Roque, dakbayan sa Talisay sa migaing gabii.
Ang mga nasikop mao sila si Jabar Salazar, 28, Rafy Padin, 27, kinsa pulos taga barangay Kinasang-an, dakbayan sa Sugbo ug Feliciano Bucao, 45, nga taga barangay San Roque, dakbayan sa Talisay.
Ang kapolisan nakadawat og report gikan sa usa ka concerned citizen bahin sa giingong paghitak sa gidiling drugas sa maong barangay hinungdan nga milusad og saturation drive ang kapolisan.
Ang grupo nga misuroy ug naniid sa maong lugar mao sila si Insp. Hugo Rio Ipong, PO2 Roy Lofranco ug PO1 Euwen Pitogo .
Si Lonfranco nga nahinabi sa Banat News nagkanayon nga pag-abot nila sa maong lugar, bukas ang pultahan sa balay ni Bucao hinungdan nga nakita nila ang maong mga suspetsado nga nagpaingon na untang manuyop og shabu.
Matud ni Lofranco nga naimbargo nila gikan sa mga suspetsado ang mga kasangkapan sa pagsuyop og shabu lakip na ang tulo ka basiyong pakete sa shabu.
Ang tulo nagtingkagol sa Talisay City detention cell ug mag-atubang og kasong paghupot og paraphernalia sa shabu. (BANATNEWS)