Babaye gipusil patay sa notadong pusher

CEBU, Philippines - Patay ang usa ka babaye nga gipusil sa usa ka tawong notadong tigpayuhot og ginadiling drugas sa sitio Lower Malibu sa barangay Subangdaku, dakbayan sa Mandaue alas-10 pasado ang takna sa miaging gabii.

Ang biktima mao si Rhea Mae Zapanta, 22, dalaga ug nagpuyo sa maong dapit samtang ang suspetsado mao si Perfecto Pepito, taga barangay Guizo sa maong dakbayan.

Si SPO1 Nelson Mayuela sa kapolisan sa Presinto 2 sa barangay Subangdaku sa maong dakbayan nga nahinabi sa Banat News miingon nga sa ilang nasayran gikan sa mga silingan sa biktima nga nagkalalis ang duha sa wala mahitabo ang maong pagpamusil.

Dangtan og pipila ka minutos kalit lang milanog ang mga buto sa armas ug dihang ilang gisusi nagbuy-od na ang biktima sa yuta nga naligo sa kaugalingong dugo.

Nakabaton kini og samad pinusilan sa dughan, usa sa iyang aping ug kamot ug daling gidala sa mga silingan sa Mandaue City Hospital apan gideklarar kini sa mga doktor nga dead on arrival.

Ang mga sakop sa presinto 2 ug Investigation Detection and Management Bureau (IDMB) nga miadto sa balay sa suspek pakyas pagpangita kaniya.

Dugang pa ni Mayuela nga ang biktima ug ang suspetsado daan na nilang gipanid-an tungod sa mga taho nga ilang nahipos nga nalambigit kini sa pagpamaligya og ilegal nga drugas sa maong dapit. Usa kini karon sa mga anggulong ilang gisubay kabahin sa motibo sa maong krimen. (BANATNEWS)