Palma andam mopatunga tali sa Palasyo ug Korte Suprema
CEBU, Philippines - Ang bag-ong pangulo sa Catholic Bishops Conference of Philippines (CBCP) president ug Cebu Archbishop Jose Palma miingon nga andam siya magpatunga aron mahilot na ang nagkagrabeng kasungian tali ni Presidente Benigno Aquino III ug Chief Justice Renato Corona.
Si Palma nagkanayon nga padayon siyang nag-ampo nga magkasinabtanay na ang duha sa labing taas nga opisyal sa nasud.
Ning bag-o lang ang Palasyo namahayag nga andam sila nga makig-diyalogo sa Korte Suprema ug mobarog ang mga kaparian isip mediator.
“I’m not quite sure how it will go down the road. But from what I understand the President is open to mediation,” matud pa ni deputy presidential spokesperson Abigail Valte atol sa usa ka press briefing niadtong miaging adlaw didto sa Malacañang.
Giklaro hinuon ni Palma nga uyon ang mga miyembro sa CBCP sa ideya isip mediator apan kinahanglan pa nila ang pipila ka panagtigom aron hisgutan ang isyu isip usa ka organisasyon.
Gikasubo usab ni Palma ang direktang pagsaway ni Aquino sa Korte Suprema niadtong Lunes sa usa ka tigom nga personal nga gitambongan ni Justice Corona.
“It was very humiliating for the Philippines,” matud pa niya.
Lakip sa mga nakasaway mao si Cebu Archbishop Cardinal Vidal kinsa mihulagway sa maong insidente nga dili maayong ehemplo sa mga batan-on. (BANATNEWS)
- Latest
- Trending
