Pari nga may uyab gireklamo

CEBU, Philippines - Usa ka pari nga nagserbisyo sa usa ka simbahan sa usa ka lungsod sa habagatang bahin sa Sugbu ang gireklamo ug buot nga ipabalhin sa mga residente human gipasanginlang nakigrelasyon ug nakighilawas sa usa ka babaye sa likod nga bahin sa ilang simbahan.

Sa interbyu sa komentaristang Si Bobby Nalzaro sa DySS kagahapon matud pa ang reklamante wala na mahimutang tungod sa eskandalong iyang nasaksihan maong kini misumbong.

Matud pa niini sa maong interbyu nga nakapadala na sila og suwat ngadto kang Cebu Archbishop Jose Palma kabahin niini.

Matud pa niya niadtong Oktubre 23 ning tuiga naaktuhan gyud niya ang iyang schoolmate ug ang pari nga naghilawas diha sa luyo sa simbahan nga dunay lamesa ug lingkuranan.

Dugang usab ni “Gerry” nga dako ang iyang pagduda nga manag-uyab ang pari ug ang maong babaye ug duna pa sila’y nadunggang duna kini karelasyong minor ug laing usa ka ‘member sa church.’ Ang presidente sa mga layko sa maong parokya (pangalan gipugngan) miangkon sa mao gihapong interbyu nga sa una nakadungog gyud sila og mga estorya sa pamabaye sa maong pari apan wala dayon sila motuo niini.

Hangtud nga diha na mismo nila kini makompirmar gikan mismo sa mga sakop sa simbahan ug wala sila makauyon sa ilang nadunggan maong misuwat sila kang Palma.

Ang Episcopal Vicar sa Archdiocese of Cebu, Msgr. Esteban Binghay mibutyag sa pakighinabi sa Banat News nga nakadungog sila sa maong estorya apan wala sila makadawat og pormal nga reklamo.

“Kadaghan nako nakadungog ana pero wala may reklamo nga naabot (simbahan), pulos man huhungihong,” sumala pa ni Binghay ug midugang nga dili sila makaimbestigar kung walay pormal nga reklamo. (BANATNEWS)