CEBU, Philippines - Duha ka sakop sa Special Reaction Unit (SRU) ang gipasanginlang nanion sa ilang tag-as nga armas ngadto sa walo ka mga tawo niadtong Miyerkules sa kaadlawon diha sa barangay Poblacion 2 sa dakbayan sa Carcar.
Ang grupo sa SRU giingong mipahigayon og preventive patrol sa nagkadaiyang barangay sa naasoy’ng siyudad niadtong higayona dihang ilang gihunongan ang grupo sa mga batan-ong nag-inom.
Ang nag-inom ug mireklamo mao sila si Francis Paras, Felgen Paras, Anthony Sanchez, Florentino Aldave, Victor Satomera, Abraham Igloria, Roberto Bargayo ug Ryan Alegrado silang tanan pulos residente sa maong lugar.
Ang mga biktima mipasangil nga duha sa unom ka mga sakop sa SRU ang miduol kanila ug mition sa ilang Armalite rifle nga naay flashlight nga walay igong hinungdan nganong sila gipangtionan.
Si Insp. James Conaco team lider sa SRU nagkanayon nga gilain lang og sabot sa mga biktima ang ‘actions’ sa iyang mga sakop ug nagtuong sila gipangtionan.
“Ang armalite dunay flashlight, wala to nanion but giiwagan lang kay naa man sa tumoy ang suga,” matud pang Insp. Conaco dihang na-interview sa The Freeman igsuong mantalaan sa Banat News.
Si Sr. Supt. Patrocinio Comendador, hepe sa kapulisan sa probinsya nagkanayon nga iyang paimbestigahan aron masuta kun unsay tinuod nga nahitabo. (BANATNEWS)