1 patay ug P2.5 M nadala sa tulisan

CEBU, Philippines - Giuyog ang tibuok dakbayan sa Toledo kagahapon sa hapon dihang gitulis sa duha ka armadong lalaking nagsakay og motorsiklo ang tulo ka mga empleyado sa M. Lhuillier nga gikan pang nag-withdraw og dakong kantidad sa Metro Bank.

Sa report sa ABS-CBN TV Patrol Central Visayas kagahapon usa sa tulo ka empleyado sa M.Lhuillier ang gipusil patay diha dayon nga nailang si Domingo Del Pilar nga taga lungsod sa Pinamungahan.

Nadala sa duha ka tulisan ang bag nga gisudlan sa P2.5 milyones nga gi-withdraw sa mga biktima kansang mga pangalan sa kauban wala pa ilha sa kapolisan tungod kay nagpadayon pa ang imbestigasyon atol ning pagsulat sa balita.

Sumala pa sa report nga nagsibilyan lang ang tulo ka empleyado nga nag-withdraw sa bangko ug gani nag tsinelas lang ang biktima aron dili mailhan.

Dihang nakagawas na ang tulo ka empleyado gikan sa bangko ug paingon na unta kining mamalik sa M.Lhuillier dala ang kwarta dihang kalit lang miabot ang duha ka lalaking nagsakay og motorsiklo nga pulos nagsul-ob og helmet ug mition kanila sa dalang armas ug mideklarar tulis.

Gikatahong nagdumili paghatag sa bag ang biktima ug misuway sa pagsukol sa tulisan hinungdan nga siya gipusil.

Dugang pa sa maong report ang kwarta nga gi-withdraw giingong mao untay gamitong pundo sa operasyon sa maong establisamento karong adlawa.

Si Sr. Supt. Patrocinio Comendador ang direktor sa Cebu Provincial Police Office mimando na sa halapad nga operasyon batok sa duha ka tulisan.

Tungod sa kakalit sa hitabo daw wala nay nakakuha pa sa plaka sa motorsiklo sa mga tawong nakasaksi sa hitabo.(/EIM)  (BANATNEWS)