Byron 'nanghagad' og sukmagay sa mga sikyu

CEBU, Philippines - Human sa kaguliyang sa Filinvest Land Inc. ug ang presidente sa homeowners sa Corona del Mar nga si kanhi Capitol consultant Byron Garcia niadtong Miyerkules gireklamo na usab ang naulahi nga nanghagad sa mga gwardiya og sumbagay nianang pagkagabii.

Si Garcia kinsa igsuon ni Gobernador Gwendolyn Garcia ang gipasanginlan sa head sa security guard sa Corona del Mar nga si Lorenzo Amameo, 28, nga mga alas 11:00 sa gabii niadtong Miyerkules, si Garcia kinsa kuyog sa ubang mga homeowners mianha sa main entrance sa subdivision ug nanghagad og sinukmagay kanilang mga gwardiya.

Matud niya nga si Garcia nagkanayon nga “dali mo diri sumbagay ta, tabangi ko ninyo duha.” Apan tungod sa kabalaka gipa-blotter ni Amameo sa polis ang insidente.

Si Garcia sa iyang habig nga nahinabi sa Banat News mipasangil nga sa mga gwardiya nga maoy namahad sa mga homeowners.

Matud ni Garcia nga usa sa mga homeowner nga si Gary Gabutero giingong gitawag sa gwardiya ug gisultihan sa usa sa mga gwardiya nga kung dili mahunong ang gubot diha sa Corona del Mar dunay usa sa homeowners ang ‘matumba.’

Si Garcia nagkanayon nga tungod niini silang mga homeowners lakip si Gabutero miadto sa main entrance sa subdivision ug gikomprontase ang mga gwardiya.

Kahinumduman nga niadtong Miyerkules sa kaadlawon ang maintenance plumber sa Filinvest nga si Michael Almanzor ang gisikop ni Garcia tungod sa pagpawong sa tubig sa 300 ka mga residente.

Apan si Atty. Dante Ramos sa Filinvest nagkanayon nga si Almanzor igo lang mihimo sa iyang trabaho pag-testing sa mga linya sa tubig kung wala bay buslot.

Si Superintendent Eddie Recamara, hepe sa Talisay City Police Station sa pakighinabi niini sa Banat News nagkanayon gipabuhian sa piskalya niadtong Miyerkules sa hapon si Almanzor tungod kay walay lig-ong ebidensiya sa kasong “malicious mischief” nga gipasaka ni Garcia batok sa plumber. (BANAT NEWS)