CEBU, Philippines - Lain na usab nga insidente sa posibleng biktima sa pagpanglugos ang nabisto pinaagi sa ‘kalihukan sa kabataan’ diha sa dakbayan sa Talisay dihang usa ka 14-anyos nga dalagita ang mipaambit sa iyang kasinatian sa mga kamot sa usa ka lalaking hubog nga milugos kaniya sa milabay’ng semana.
Ang maong bata misalmot sa “Bible Study” sa mga kabataan diha sa Santa Teresa de Avila Parish Church ug usa sa ilang gihimo mao ang pagpaambit sa ilang mga kasinatian ug diha kini miyagyag sa pagpangabusong iyang naagian niadtong milabay’ng semana.
Ang lider sa grupo mao nay mipahibalo sa ginikanan sa bata kinsa gikuyogan sa igsuon pagsumbong sa kapolisan. Sa imbestigasyon ni PO2 Violeta Godines sa Women and Children Protection Desk (WCPD) sa Talisay City Police Station nagduwa og tago-tago ang biktima ug mga higala sulod sa abandonadong balay sa iyang apohan.
Nianang tungora giingong adunay mga lalaking nag-inom sa gawas sa maong balay ug gibadlong sila sa usa sa mga nag-inom hinungdan nga nanggawas ang mga bata.
Apan gialihan sa maong hubog ang biktima ug gibunlot pasulod sa usa sa mga lawak nga gialihan dayon sa maong lalaki og plywood ang pultahan ug didto gilugos siya sa maong lalaki, matud pa sa bata misuway siya pagsinggit apan gisap-ongan sa lalaki ang iyang baba.
Matud pa sa bata makaduha ka higayon siyang gilugos sa maong lalaki ug pagkahuman nakaeskapo siya ug nakadagan sa gawas sa maong balay apan wala motug-an sa mga ginikanan sa kahadlok nga maoy mabunalan.
Niadtong Lunes ang suspetsado napasakaan na og kasong pagpanglugos diha sa piskaliya sa siyudad. (/EIM) - (BANAT NEWS)