Revilla nagpasalamat sa gobernador

CEBU, Philippines - Nagpasalamat si Mayor Strike Revilla sa lungsod sa Bacoor, lalawigan sa Cavite   kang Gobernador Gwendolyn Garcia   gumikan sa suporta nga gitunol niini sa   dakong tigum sa League of Municipalities of the Philippines (LMP) dinhi sa Sugbo sa miaging adlaw.

Si Revilla kinsa maoy presidente sa LMP nagkanayon nga ang nakab-ot nga kalamposan sa General Assembly Meeting sa tanang sakop niini dinhi sa lalawigan nga gipahigayon sa Cebu International Convention Center nakab-ot gumikan sa abag sa kagamhanan sa lalawigan sa Sugbo.

Matud pa ni Revilla nga daghang mga butang nga ilang natuki nga labing mopalig-on sa pangalagad sa mga mayor sa tagsatagsa ka syudad ug lungsod nga nahimutangan nila.  

 Lakip nga gipasalamatan ni Revilla mao sila si Bise Gobernador Agnes Magpale, mga miyembro sa Cebu Provincial Board ug si Mayor Nelson Garcia sa Dumanjug kinsa maoy LMP Cebu Chapter President

 Alang ni Revilla si Gobernador Garcia ug ang kagamhanan sa lalawigan sa Sugbo usa ka   lig-ong sagabay sa LMP.

Kini tungod kay ang buhatan sa gobernador wala magmakawang sa pagpa-ambit sa mga kasayoran bahin sa malampusong lakang niini sa pagpalambo sa turismo ug uban pang industriya sa Sugbo hinungdan nga napili kining lugar alang sa nahisgutang General Assembly sa LMP.  - BANAT NEWS