Mipatay sa 2 ka tawo nailhan

CEBU, Philippines - Usa sa tulo ka mga kriminal nga mipusil patay sa duha ka tawo ug miangol sa laing usa didto sa barangay San Isidro, dakbayan sa Talisay sa miaging Lunes sa kaadlawon, nailhan na sa mga polis.

Si SPO1 Mikie Espina sa kapolisan sa Talisay City Police Office nagkanayon nga dili pa nila ikabutyag ang ngalan sa maong suspetsado karon.

Apan matud pa niya nga ila pa kining gipanid-an karon ug kun masikop nila kini ila nang ibutyag sa mga tigbalita ang iyang ngalan ug    patug-anon nila sa laing duha niya ka mga kauban, sumala ni Espina.

Ang gipatay niining tawhana uban sa duha niya ka kauban mao sila si Eduard Bantilan Jr., residente sa Artville, sa nahisgutang barangay ug drayber sa Juscar Taxi nga nagtangag sa plakang GXC-775 ug ang higala niini nga si Ralph Stephen Villadolid Mamuco, nga iyang silingan kinsa nasabak sa dughan ug buko-buko ang usa’g-usa .

Ang ikatulong gipusil sa suspetsado ug mga kauban mao si Rey Delantar Refuela taga barangay Lipata, lungsod sa Minglanilla, kinsa wala maintimano kay nasabak kini sa mga bala sa kilid ug sa paa ug anaa kini karon sa tambalanan.

Sumala sa kapolisan nga nag-inom ang tulo ka mga biktima sa usa ka tindahan sa lugar nga nahitaboan dihang miabot ang tulo ka kriminal nga nagsakay og motorsiklo dayong pauwan og mga bala ngadto sa mga biktima.

Matud ni Espina nga usa sa mga motibo sa maong pagpamusil mao ang atraso o personal nga bangi tali sa grupo sa mga biktima ug sa suspetsado.

Si Supt. Eddie Recamara, hepe sa Talisay City Police sa pakighinabi sa Banat News kagahapon nagkanayon nga sa mga milabay’ng insidente love triangle ug atraso ang kasagarang hinungdan.

Matud niya nga ang kapolisan sa siyudad higpit nga mi-implementar sa mga pamaagi batok sa mga krimen apan adunay mga higayon        nga dili gyud nila mapugngan.

 “Ang importante despite nga adunay mga shooting incident na-solve nato, ang atoang crime solution atoa nang gipaningkamutan 100 percent para dili magbalik-balik ang panghitabo”, ni Recamara pa.  - BANAT NEWS