CEBU, Philippines - Usa ka notadong illegal drug pusher nasikop sa kapolisan ug nasakmitan usab og 16 ka paketeng shabu didto sa barangay Pugalo, lungsod sa Alcoy sa miaging gabii.
Ang suspek mao si Eric Austria Palomo, 24, ulitawo nga taga dalan A. Lopez ning dakbayan sa Sugbo kinsa nagpailang sakop sa Akrho.
Gawas sa 16 ka paketeng shabu nga tag P500 ang kantidad sa matag usa, nabawi usab sa kapolisan ang P500 nga silbing paon nila sa pagpalit kunohay og shabu ngadto sa suspetsado.
Si Insp. Reyco Romaguera, hepe sa Alcoy Police Station mibutyag sa Banat News nga ang suspek gikang nangumpra sa maong mga butang sa siyudad sa Sugbo ug sa pag-abot niini sa lungsod sa Dalaguete nanaug kini unya misakay kini og traysikol paingon sa lungsod sa Alcoy aron dili masakpan.
Apan wala siya makabantay nga may asset ang kapolisan nga gipapaniid sa iyang lihok ug dihang nahiabot na siya sa Pugalo, didto gihikay dayon ang buy bust operation uban sa marked money nga P500 nga gigamit sa usa ka police decoy.
Dihang nadawat na sa suspek ang maong kuwarta, gitunol usab niini ang usa ka paketeng shabu ug dihadiha giposasan dayon siya sa mga polis nga milusad sa maong operasyon.
Nagkagulkol na siya karon sa prisohan ug nag-atubang sa kasong paglapas sa balaod bahin sa gidiling drugas. - BANAT NEWS