Barko vs barge nagpingki

CEBU, Philippines - Naluwas ang mokabat 221 ka pasahero ug 22 ka mga tripulante sa MV Light Ferry 8 nga mitapsing sa nag-angkoraheng barge sa kadagatan sa Batolinao Point sa barangay Mactan, dakbayan sa Lapulapu alas-3 pasado ang takna sa miaging kaadlawon.

Ang assistant vice president for operations sa Lite Shipping Corporation nga si Oliver Pulanco sa gipadalang text message mibasol sa MB Ironman 1 tungod kay gi-angkorahe kining walay suga ug diha pa gyud sa bukana sa Mactan Channel.

“A dumb barge named Iron Man 1 was irresponsibly anchored at the vicinity of Bantolinao light house entering the north Cebu channel without any light,” matud pa sa text niini sa The Freeman, ang igsuong pamantalaan sa Banat News.

Sumala pa ni Pulanco gihimo sa kapitan sa MV Light Ferry 8 ang tanan aron malikayan aron dili mabanggaan ang maong barge apan ang angkla niini nasangit sa kable sa angkorahe sa maong barge hinungdan nga nagpingki ang duha.

Hinuon luwas ang tanang sakay sa maong pasaheroang barko apan pipila kanila ang nalisang tungod sa nahitabo.

“All 220 passengers were safe including five children and 44 crew,” matud pa ni Pulanco.

Si Cebu Coast Guard Commander Punzalan miingon nga alas-10 sa miaging gabii mibiya sa pantalan sa Ormoc City ang Light Ferry 8 ug gikatakdang modunggo sa Cebu Port alas-4 sa kaadlawon kagahapon.

Sa marine protest ni Captain Sergio Herodias sa M/V Lite Ferry 8 kini mibutyag nga nasurpresa sila nga dunay barge nga walay suga sa ilang agianan maong gimando niya ang paglikay niini apan nasangit sila sa kable sa angkla sa barge.

Samtang ang tugboat master nga si Roland Hinojales sa M/Tug Strong Devotion nga maoy nagguyod sa barge sa ilang marine protest nagkanayon nga ang barko maoy nakaigo sa kable sa ilang angkla.

Matud pa ni Hinojales naguba ang anchor roller ug anchor cable sa ilang barge.  - BANAT NEWS