Special child gilugos, laing usa naluwas sa iring

CEBU, Philippines - Usa ka special child ang gilugos samtang laing 16-anyos nga dalaga ang nasalbar sa ilang iring gikan sa silingang misuway na unta og lugos kaniya niadtong Domingo sa gabii sa managlahing lugar.

Kasamtangan na karong gibalhog sa karsel ang usa ka Jovito Racaza, nga drayber og traysikad human kini gitumbok sa 22-anyos nga dalagang may kakulian sa pangisip nga taga Carcar. Ang biktima nagpuyo sa usa sa mga barangay sa maong lungsod mireklamo uban sa mga ginikanan batok sa gibuhat sa suspek.

Sumala pa nga misakay ang biktima sa suspek aron magpahatud sa ilaha dihang pag-abot sa ngitngit nga lugar kalit lang gihunong sa suspek ang traysikad ug gilugos ang biktima.

Pag-abot sa biktima sa ilang balay misumbong kini dayon sa mga ginikanan sa nahitabo hinungdan nga miadto sila sa kapolisan ug mipadakop sa suspek.

Matud ni PO1 Julio Canolas sa Carcar City Police Station dihang nahinabi sa Banat News, ang women’s desk miasikaso na pagpasaka og tukmang sumbong batok sa suspek.

Samtang swerteng nakalingkawas gikan sa suway nga paglugos ang 16-anyos nga dalagita tungod sa iring nga nagpunay og kawras sa nawong sa igsuon niining lalaki nga nakamata ug nakasakop sa usa ka naghubong lalaking mipatong na unta sa biktima.

Si PO2 Rochelle Jugalbot sa Liloan Police Station miingon nga nahinanok sa pagkatulog ang biktima ug ang 12-anyos niining igsuon sa sulod sa ilang panimalay sa barangay Yati dihang nahitabo ang krimen.

Matud pa ni Jugalbot nga tibuok adlaw nga nangaligo sa dagat ang managsuon ug lapoy kaayo ang lawas maong dali silang nakatulog ug wala makamatikod sa pagsulod sa maong lalaki nga giingong ilaha rang silingan.

Dugang pa ni Jugalbot dihang nakamata ang 12-anyos nahuboan na sa maong lalaki ang igsuon niini sa gisuot nga jogging pants ug wala na usab shorts ang maong lalaki ug nagpatong na.

Daling misinggit ang 12-anyos ug nangayo og tabang hinungdan nga naputol ang biga sa maong lalaki ug daling mibarog dayong layat sa bintana ug mikaratel og dagan.

Ang magsuon midangop sa kapolisan aron isumbong ang hitabo, si SPO2 Gay Servilla sa women’s desk section midala sa biktima ngadto sa Vicente Sotto Memorial Medical Center sa dakbayan sa Sugbo sa pagpaubos sa medical examination.

Ang maong lalaki kinsa giingong namay-ongan sa bata posibleng mapasakaan og kaso kung tinud-on sa banay sa biktima.(/EIM) (BANATNEWS)