Mga bata giinggansaha'g armas sa polis

CEBU, Philippines - Nag-atubang karun og problema ang usa ka pulis human gireklamong miinggansa sa iyang armas ngadto sa mga batang menor de edad sulod sa vediokihan samtang nag-inom kini uban sa duha ka sibilyan sa miaging gabii diha sa S. Soriano St., North Reclamation Area sa barangay Mabolo siyudad sa Sugbu.

Si SPO1 Adonis Burgos nadestino sa San Nicolas Police Station natanggong sa Mabolo Police Station human gialarma ug gidakop sa Mobile Patrol Group (MPG) ug ingon man gidis-armahan sa iyang service firearm.

Si Chief Insp. Sara Jean Recla, hepe sa Mabolo Police Station nga nahinabi sa Banat News nagkanayon nga ilahang gibuhian si Burgos alas-11 pasado sa buntag human ang mga ginikanan sa mga bata dili na interesadong mokiha sa maong pulis dihang nangayo kini og pasaylo kanila.

Sumala pa ni Recla nakainom si Burgos ug gibadlong niini ang lima ka mga batang menor de edad nga nagpangidaron og onse ug 13-anyos kay gisabaan kini apan wala mopatuo kaniya hinungdan nga gibunotan niya sila sa iyang armas. Matud ni Recla nga nangatarongan si Burgos nga iya rang gibadlong ang mga bata kay gisabaan siya niini uban sa duha ka sibilyan. Tungod sa kahadlok sa mga bata nanagan kini paingon sa gawas.

Matud ni Recla hugot nga mihimakak si Burgos nga gipangtionan niini sa armas ang mga batang menor de edad sulod sa tindahan

“Pagdala gyud diri nakainom siya ( Burgos ) dili ingon hubog kaayo,” dugang pang Recla.

Si Jeanette Montellano, inahan sa duha ka bata nga nahinabi sa mga tigbalita misaysay nga naninda siya sa luyo sa vediokihan nga nagkantakanta ang iyang anak nianang tungora apan giibtan og armas ni Burgos ug giinggansa kini diha ilawom sa lamesa.

Midugang si Montellano nga iyaha nalang gipasaylo si Burgos apan ang iyang gusto nga dili nalang mobalik ang maong pulis diha sa vediokihan kay nagbalik-balik na kini didto. “Katulo naman nako makit-i nga nianha siya sa videokihan.”

Si Sr. Supt. Melvin Ramon Buenafe, hepe sa Cebu City Police Office (CCPO) mimando sa Investigation and Detective Management Branch (IDMB) Chief Insp. Bonifacio Graciano sa paghimo’g imbestigasyon batok kang Burgos .

Matud ni Buenafe mag-atubang og kasong administratiba ang maong pulis kun mapamatud-an nga kini sad-an sa iyang gibuhat. Sugod kagahapong adlawa girelibohan si Burgos ug idestino diha sa iyang buhatan. (BANATNEWS)