CEBU, Philippines - Patay diha-diha ang 27-anyos nga dalaga human giunay og dunggab sa iyang selosong kapuyo atubangan mismo sa ilang tulo ka gagmay’ng mga anak sulod sa ilang pinuy-anan sa sitio Pahulayan, barangay Bugho lungsod sa Moalboal niadtong Domingo sa alas 3:00 sa hapon.
Ang biktima mao si Bernadeth Doremon Bagasa, 27, nagpuyo sa maong lugar ug ang suspek mao ang iyang kapuyo nga si Alberto Celestial, 28, ang duha adunay tulo ka mga anak.
Matud ni PO1 Melvin Delica sa Moalboal Police Station dihang nahinabi sa Banat News nangabugho ang suspek sa biktima tungod kay nagduda kining aduna kini laing gikabuangang lalaki.
Ang duha gikatahong naglalis atubangan sa ilang mga anak ug sa tanto nilang tinubagay mikuha og kutsilyo ang suspek ug gihansakan ang babaye sa tiyan nga niadtong tungora tupad sa ilang 3-anyos nga anak babaye.
Dihang nakita sa suspek nga nahagba ug nagkadugo na ang kapuyo ug mitiyabaw na ang ilang mga anak nagsunod usab kini og dunggab sa iyang kaugalingon apan wala kini maantimano ug naabtan sa mirespondeng mga polis dangtan ang pipila ka minutos human dunay nakasumbong kabahin sa nahitabo sa sulod sa maong balay apan patay na ang babaye.
Ang suspek gihatud sab dayun sa kapulisan sa Badian District Hospital aron patambalan apan gi-transfer sa tambalanan dinhi sa dakbayan sa Sugbo alang sa dugang medikasiyon.
Ang kapulisan gikatakdang mopasaka og kaso batok sa suspek samtang gikatakdang ihatud ang mga anak sa duha ngadto sa labing duol nilang kabanay aron maoy moatiman kanila. (BANATNEWS)