CEBU, Philippines - Duha ang patay usa niini taxi drayber ug usa sab ang samdan human sila gipamusil sa tulo ka armadong mga lalaki nga nagsakay og motorsiklo samtang nag-inom kagahapon sa kaadlawon diha sa barangay San Isidro sa dakbayan sa Talisay.
Si Eduardo Bantilan Jr., 29, nagpuyo sa ArtVille Subdivision, San Isidro ug taxi drayber sa Juscar Taxi nga may plakang GXC-775 dead on arrival (DOA) sa Talisay District Hospital human nakaangkon og samad pinusilan sa iyang dughan; Ralph Stephen Villadolid Mamuco, 24, taga ArtVille Subdivision kinsa nakahiagom og samad sa iyang bukobuko.
Samtang ang samaron mao si Rey Delantar Refuela, 30, taga Lipata lungsod sa Minglanilla naigo sa iyang tuong kilid nga giingong mga sakop sa Alpha Kappa Rho sumala pa sa report sa Buena Mano Balita sa GMA-7 kagahapon.
Tulo ka wala mailhing lalaki nga nagsakay og motorsiklo ang gitumbok nga kalit namusil sa mga biktima.
Si SPO1 Mikie Espina, imbestigador sa Homicide Section sa Talisay City Police station nga nahinabi sa Banat News nagkanayon ala-1:20 sa kaadlawon nag-inom atubangan sa tindahan ang mga biktima uban sa laing duha ka kauban diha sa eskina sa San Isidro.
Giingong kalit lang miabot ang tulo ka mga lalaki ug ang duha nga nag-angkas nanganaog ug sa walay igong hinungdan mibunot sa dalang armas ug gipamusil ang mga biktima. Duha ka mga kauban sa biktima ang nakalingkawas sa maong hitabo.
Matud ni Espina nga una nilang nailhan si Bantilan ug Delantar samtang alas-5 na kagahapon sa buntag ilang nakit-an ang patay’ng lawas ni Mamuco nga nakadagan diay sa ngitngit nga bahin sa maong lugar bisan samaron apan pagkahayag-hayag na nakit-an ang patay’ng lawas niini.
“Pagbuto-buto na nagdinaganay naman ni sila, ang gidaganan ni Mamuco ngitngit nga portion naigo siya sa bukobuko amo ni siya gipangita ganihang kaadlawon,” matud pa ni Espina.
Si Bantilan namasahero niadtong higayona apan iyang naagian sa dapit nga nag-inom ang mga kaila mihunong siya ug niapil sa pag-inom.
Si Espina miingon nga dili pa nila ma-establisar unsay motibo nganong gipamusil ang mga biktima sanglit nagpadayon pa ang ilang pakisusi aron mailhan ang mga responsable sa pagpamusil.
Hinuon duna na silay mga saksi ug gani may nakamay-ong sa hitsura sa mamumuno apan wala lang kini makaila sa pangalan. Ang duha ka kauban sa mga biktima nga nakalingkawas sa hitabo mitug-an sa kapulisan nga wala silay kontra o atraso sa maong dapit. Apan dunay report nga ang maong dapit dunay daghang mga batan-ong sakop sa fraternity apan si Espina dili pa mokompirmar niini sanglit nagpadayon pa sila sa ilang pakisusi. Nakuha sa kapulisan sa crime scene ang usa ka kabhang sa .9mm ug usa ka deformed slug.(/EIM) (BANATNEWS)