Pusher og shabu sa Tabogon natiklo

CEBU, Philippines - Usa ka notadong drug pusher sa amihanang bahin sa lalawigan nasikop sa kapolisan didto sa barangay Ilihan, lungsod sa Tabogon sa miaging kaadlawon.

Ang nasikop nailhan nga si Derick Arpon, hingkod ug molupyo sa maong lugar kinsa maoy mamaligyaay og shabu sa maong dapit.

Hinuon upat ra ka gagmay’ng putos sa shabu ug P200 nga kuwarta nga gituohang   halin sa shabu ug usa ka cellphone maoy nasakmit sa kapolisan gikan sa suspetsado.

Usa ka search warrant nga giluwat ni Judge Antonio Marigomen sa RTC-branch 61, sa dakbayan sa Bogo batok sa suspetsado maoy dala sa kapolisan sa pagronda niini sa balay sa suspetsado.

Pinaagi sa maong dokumento gisiksik sa kapolisan ang  mga suok sa balay sa suspetsado ug didto nakapunit sila og gamay’ng plastic nga adunay sulod nga upat ka sachet nga gituohang shabu, P200 nga salapi ug usa ka cell phone sa suspetsado.

Matud pa ni SPO4 Douglas Amores, Intelligence sa Tabogon Police Station   nga sa sayo pa nakadawat sila og impormasyon bahin sa giingong hilabihan kakusog nga negosyo sa shabu sa suspetsado sa ilang lugar.

Hinungdan nga gi-aplayan dayon nila og search warrant nga misangpot sa pagkasikop sa suspetsado apan nagdumili kini pagbutyag sa tinubdan sa iyang mga baligyang shabu.  - BANAT NEWS