May karelasyong minyo gipatay

CEBU, Philippines - Patay ang usa ka lalaki nga giingong ex-convict ug may karelasyong babayeng minyo human kini pusila sa wala mailhing mga mamumuno niadtong Sabado sa hapon diha sa barangay Central Biasong, dakbayan sa Talisay.

Ang biktima mao si Adonis Amaquin, residente sa maong lugar ug drayber sa traysikad, gisusi usab sa kapolisan ang report nga usa kini ka ex-convict.

Si Amaquin kinsa nakaangkon og samad pinusilan sa iyang ulo wala na kini kinabuhi sa pag-abot sa mga sakop sa Talisay Rescue Emergency Action Team (TREAT) nga modala unta niya ngadto sa tambalanan.

Sila si SPO2 Oliver Dacua, PO3 Benedicto Lasque, PO2 Roy Lofranco ug PO1 Dennis Onasin ang daling miresponde sa hitabo ug nasuta nga si Amaquin uban sa iyang mga higala nga nag-inom diha sa tindahan sa hepe sa mga tanod sa ilang barangay nga si Eddie Naranjo. Human sa panag-inom, si Amaquin uban sa iyang higala nga si Loreto Traya, 43, residente usab sa maong barangay ang mibiya sa tindahan paingon na untang mopauli sakay sa traysikad sa biktima dihang kalit lang mitungha ang duha ka mga lalaking sakay og usa ka motorsiklo.

Usa sa maong mga lalaki gibana-banang nagpangidaron og 30-anyos ug ang usa 18-anyos, parehong sapsing og mga lawas ug tabonon og mga pamanit ang kalit namusil sa biktima.

Si Amaquin nahagba diha sa karsada samtang mga kriminal daling mipasutoy sa motorsiklong ilang gisakyan.

Si Lofranco nga nahinabi sa Banat News kagahapon nagkanayon nga usa sa mga motibo nga ilang gilantaw sa maong hitabo kabahin sa love triangle tungod kay sa nahipos nilang report ang biktima giingong nakig-relasyon og usa ka minyo nga babaye.

Ang maong babaye giingong magsuroyan diha sa lugar sa biktima ug dunay makakita nga ang duha mag-inom, dugang pa ni Lofranco nga nasakpan na kaniadto ang biktima nga nakigkita sa maong babaye apan gigukod kini og pinote sa bana.

Laing anggulo nga gisubay usab sa mga polis mao ang personal nga bangi tungod kay base sa impormasyon gikan sa mga higala sa biktima ex-convict si Amaquin ug duna kini nakabingkil kaniadto.  - BANAT NEWS