CEBU, Philippines - Sa unang higayon nga pagbisita dinhi sa Sugbo isip bag-ong kalihim, si Tourism Sec. Jimenez Jr. nibisita dayon sa sikat na kaayong dancing inmates sa Cebu Provincial Detention and Rehabilitation Center ( CPDRC) niadtong nakalabay nga adlaw.
Matud pa, si Jimenez nakadayeg kaayo sa pang world class nga sayaw sa dancing inmates ug misaad nga iyaha kining i-promote sa mga lokal ug langyaw nga turista. Iyang gihulagway ang CPDRC dinhi sa Sugbo nga usa ka ‘unique’ nga tourist spot sa tibouk kalibutan tungod sa maong sayaw sa mga piniriso.
Nanghinaot si Jimenez nga ipadayon sa CPDRC ang maong programa ug giawhag niya ang mga bilanggo sa pagpakita sa ilang abilidad sa pagsayaw hangtud nga sila makagawas na.
Ang bag-ong kalihim mipahigayun sa iyang labing unang pagbisita sa CPDRC kauban ang iyang undersecretary nga si Ma. Victoria Jasmin, Department of Tourism Central Visayas Regional Director Rowena Montecillo, ang mga delegado sa First Asian Underwater Federation Photography ug ang expert team sa Japan sa Japan Internatinal Cooperation Agency kon JICA. (BANAT NEWS)