CEBU, Philippines - Gipasalig sa Globe Telecommunication ang hugot nga suporta sa kamanduan sa National Telecommunications Commission (NTC) sa pagpakunhod sa rate sa interconnection sa Short Message Service (SMS) o text messages.
Si Atty. Froilan Castelo, head corporate and Legal Services Group sa Globe Telecom nagkanayon nga ang pagpakunhod ngadto sa 15 sentimos sa SMS interconnection access rate paborable sa Globe ug sa mga kostumer.
Gipasabot niya nga pinaagi niini ang Globe makatanyag pa unya og dugang sms based unlimited, bulk ug all network promos samtang ang mga kostumer mamenusan ang gastos sa load ilabi na sa migamit og mga unlimited services.
Sa pagkakaron ang mga kostumer sa Globe nakabenepisyo og moduol sa 10 sentimos nga average rate matag SMS tungod sa inter ug all network bulk unli-offers lakip na sa postpaid ug consumable plan offerings.
Kahinumduman nga sa milabay’ng buwan ang NTC mipagawas sa Memorandum Circular 02-10-2011 nga nagmando sa tanang communications company providers nga pakunhoran ngadto sa 15 sentimos ang ilang mga SMS rate.
Ang memorandum giluwatan sa NTC niadtong Oktubre 24, 2011 ug giimplementar niadtong Nobiyembre 10, 2011.
Si NTC-Central Visayas director Allan Macaraya nagkanayon nga kini aron makabarato ang mga tiggamitan og cellphone.
Si Gamaliel Cordoba, NTC Commissioner nagkanayon nga ang bag-ong SMS interconnection charge ubos kini sa Section 5 sa Akta Republika 7925 kon “the Public Communications Policy Act”,
Ubos sa maong balaod mao ang paghatag og patas ug makiangayon nga interconnection cost tali sa public operators ug ubang mga telecommunication service providers.
Ang maong balaod gisuportahan usab kini sa Executive Order 546 of 1979 diin tumong niini mao ang pag-reduce sa telecommunication costs ug foster fair competition sa industriya.
Gawas kang Cordoba, ang Memorandum Circular 02-10-2011 giaprobahan usab kini sa mga Deputy Commissioner nga si Carlo Jose A. Martinez ug Delilah F. Deles. (BANAT NEWS)