CEBU, Philippines - Mikabat sa P30 mil kapin nga kuwarta ang nasakiyo sa wala hiilhing kawatan nga milungkab sa buhatan sa mga driver didto sa terminal sa barangay Poblacion siyudad sa Danao kagahapon sa alas 5:15 sa buntag.
Ang maong buhatan iya sa Danao Compostela Operators and Drivers Association (DACOTODA).
Ang pundo sa mga driver nga gibana-banang mikabat og P32 mil maoy gipupho sa wala hiilhing kiriwan gikan sa hunos nga gisudlan sa maong kuwarta.
Apan di lang kawatan sa gawas ang gidudahan sa mga tigpaniid , kay basin inside job ra usab o kauban ra sa kapunongan nga naapiki ang kuwarta ang mikiriw sa maong salapi.
Kadako sa maong kantidad ug nganong wala ideposito sa bangko, nga usa sa mga pangutana sa ubang mga sakop sa maong kapunongan.
Si PO1 Faron Avila, desk officer sa Danao City Police mibutyag sa Banat News nga si Felomino Pecidas, hingkod, ug usa ka opisyal sa DACOTODA maoy nangabli sa ilang opisina kagahapon sa buntag dihang sa pagsulod niya maoy misugat sa iyang panan-aw ang nabuslot nga kisame ug sa iyang pagsusi abli na usab ang hunos sa lamesa nga gisudlan sa kwarta.
Didto labing mihuyhoy ang iyang abaga dihang pagsil-ing niya sa hunos, wala na ang P32 mil nga iyang gihiposan. Wa siya’y laing nahimo gawas sa pagtaho niini ngadto sa kapolisan, kinsa sa pagkakaron padayon pang naniid kinsay responsabli sa maong kawat. (/WC) (BANAT NEWS)