CEBU, Philippines - Kapin sa tunga sa milyon ka pesos nga balor sa mga bulawang alahas ug mga butang ang nasakiyo human gilungkab ang pinuy-anan sa usa ka ginang diha sa barangay Sangat sa lungsod sa San Fernando niadtong Biyernes sa alas 3:00 sa hapon.
Ang nabiktima sa pagpanglungkab mao si Maria Sandra Sabellano, molupyo sa nahisgutang lugar apan aduna nay gidudahang responsable sa maong pagpangawat nga mao ang pag-umangkon ni Sabellano nga si Mercy Macormike ug kapuyo niining si Clifford Nicholas, nga silingan sa biktima.
Matud ni PO2 Janel Figura sa San Fernando Police dihang nahinabi sa Banat News subay sa imbestigasyon wala diha sa ilang balay ang pamilya sa biktima tungod sa gitambongang importanteng kalihukan sa siyudad sa Carcar ug walay bisan usa nga nabilin sa ilang balay.
Sumala pa sa kapolisan samtang wala ang banay’ng Sabellano nakahigayon ang mga suspek pagguba sa pultahan sa likod nga bahin ug dihang nakasud na sa balay gipangkuha ang mga bulawang alahas sa biktima diha sa kwarto nga mobalor og P400 mil.
Gikuha usab ang laptop nga mokantidad og P40 mil, digital camera nga P50 mil, Soligen spoon and pork set nga mokantidad og P50 mil.
Atol sa gihimong imbestigasyon sa kapulisan usa ka silingan sa biktima ang nakakita sa duha ka suspek nga misulod sa balay sa mga Sabellano dihang nanglakaw ang pamilya.
Atol sa gihimong follow up operation sa kapulisan nasuta nga wala na sa ilang pinuy-anan ang mga suspek ug padayon pang gipangita sa kapulisan. (BANAT NEWS)