15 ka container nga krudo nasakmit

CEBU, Philippines - Mikabat sa 15 ka container nga krudo nga gikarga sa usa ka multicab nga   pasaheroan nasakmit sa kapolisan sa dakbayan sa Naga niadtong Huwebes sa kaadlawon.

Gawas sa maong mga ginalon nga krudo gilakip usab pagsakmit sa kapolisan ang multicab nga gikargahan niini nga may rotang Naga-Basak nga may plakang GXC-923 nga gimaniho ni Leonardo Sebial taga dakbayan sa Talisay.

Ang maong mga krudo giingong gipanag-iya ni Ronnel Montebon, sa barangay South Poblacion, dakbayan sa Naga.

Si PO3 Glenn Burlas ug PO2 Oliver Ortega kinsa nag- patrolya diha sa kadalanan sa Talisay niadtong tungora maoy nakabantay sa maong mga kargamento busa gipahunong nila ang maong sakyanan ug nakita sa maong mga polis ang mga krudo nga karga niini.

Ang drayber sa multicab wala makapakita og mga dokumento sa iyang pagbiyahe sa maong mga krudo hinungdan nga gisikop kini.

Apan wala ikasuwat sa blotter sa kapolisan kun diin dapita sa Talisay nasikop sa mga polis ang maong mga kargamento.

Si Superintendent Eddie Recamara, hepe sa Talisay City Police Station nga nahinabi sa mga tigbalita kagahapon nagkanayon nga delikado ang pagbiyahe sa maong mga krudo ilabi na kun walay gikapakitang mga dokumento ang   driver sa multicab hinungdan nga ilang gisikop.

Matud ni Recamara nga hangtud dili motungha sa ilang buhatan ug magdala og mga dokumento ang giingong tag-iya sa maong mga krudo dili usab nila kini i-release lakip na ang sakyanan.

Ang hepe nagkanayon nga makig-alayon sila ngadto sa Department of Energy (DOE) bahin sa maong hitabo.

Sa report nga nadawat sa kapolisan, nasayran nga ang tinubdan sa maong mga krudo giingong naggikan sa lungsod sa San Fernando.  - BANAT NEWS