May diskwento sa Carbon Market karong Pasko

CEBU, Philippines - Gidasig sa Market Administrator sa siyudad sa Sugbo nga si Racquel Arce ang publiko nga adto mamalit sa Carbon Market kung buot silang makadaginot ilabi na nga nagkaduol na ang adlaw sa Pasko.

Gikatahong dunay mga tindera sa Carbon ang mohatag og diskuwento ngadto sa ilang suki nga mamalitay isip kabahin sa pag-selebrar sa Pasko.

Ang Carbon market nagsaulog karon sa programa nila nga “Kasadya Sa Carbon” diin ang mga negosyante magbutang og dekorasyon sa ilang mga tindahan.

Pormal nga sugdan ang nahisgutang programa karong Lunes, Disyembre 5.

Samtang pabilin gihapon nga gimentinar sa mga negosyante sa Carbon Market ang kalimpiyo sa ilang dapit pinaagi sa pagpatuman sa saktong pagbahig sa basura.

Nagkanayon si Mayor Michael Rama nga daghan na unya og kapilian ang mga tawo kung asa sila gusto mamalit. Si Rama anha magtambongan og Misa de Gallo sa Carbon sulod na sa pipila ka tuig.  - BANAT NEWS