Misis ug kapuyo gipamusil sa bana

CEBU, Philippines - Talandugon ang kahimtang sa 33-anyos nga ginang ingon man ang iyang 23-anyos nga kabit human gisulong ug gipamusil sa bana sa babaye nga overseas Filipino worker (OFW) didto sa ilang gipuy-an sa Magsaysay Hills, Poblacion siyudad sa Toledo kagahapon sa alas 5:45 sa sayong buntag.

Ang biktima nga naigo sa iyang tangkugo mao si Marissa delos Santos Sayson, 33, minyo ug asawa sa suspek ug taga Luray-I Poblacion Toledo ug ang giingong kapuyo niini nga si Christian Lumantao Galacite, 23, ulitawo taga Awihaw, Toledo City.

Samtang ang suspek mao ang bana ni Marissa nga si Margel Uy Sayson, 41, nagpuyo sa Poblacion, Toledo City ug duna sila’y mga anak.

Matud ni SPO1 Roel Tadique sa Toledo City Police dihang nahinabi sa Banat News subay sa imbestigasyon miabot ang suspek niadtong milabay’ng bulan sa Marso gikan sa gawas ug nakigbuwag sa iyang asawa tungod sa mga tabitabi nga nakigrelasyon kini og laing lalaki.

Apan kagahapon sa buntag gisulong niini ang asawa nga nakigpuyo na kang Galacite diha sa giabangang balay nga gipanag-iya sa uyoan sa naulahi.

Atol sa pagsulong giingong naligo sa gawas si Christopher samtang si Marissa mao pay paggawas sa balay aron hatdan unta kini og senina nga masul-ob.

Naatol nga maoy pag-abot sa suspek ug gidiretso og pusil si Marissa sa luyong bahin sa tangkugo gamit ang wala matinong kalibre ug dihang migawas sa banyo si Christopher gisunod kini og pusil sa suspek duha ka higayon ug naigo sa liog ug tuong bahin sa kamot. Ang suspek daling miikyas samtang gitabang sa mga silingan ang duha ug gihatud sa Toledo City District Hospital apan gipabalhin sa tambalanan dinhi sa dakbayan sa Sugbo tungod sa kapeligro sa ilang kahimtang.

Ang suspek mitahan sa mga polis ug nagtingkagol na karon sa karsel samtang nagpaabot sa tukmang sumbong nga ipasaka batok niya.

Gitug-an sa suspek ngadto sa mga polis nga wala na siya makaantos tungod kay loving kaayo kini sa iyang batan-ong kapuyo ug magpa-plastada pa gyud sa ilang mga kaila kun manuroy.  - BANAT NEWS