CEBU, Philippines - Nagpusil sa iyang kaugalingon ang usa ka 22-anyos nga lalaki duol sa buwaran og kopras sa ilang balay sa sitio Ga-ang sa barangay Lamesa lungsod sa Balamban .
Si Nerio Remocaldo Sabido, 22, nagpuyo sa maong lugar dead on arrival (DOA) sa Balamban District Hospital dihang nagpusil sa iyang tampihak gamit ang .38 nga kalibre sa armas.
Segun sa taho sa kapulisan sa Balamban nga dunay problema si Sabido bahin sa gugma bahin sa iyang umaabot nga fiancee kini base sa nakuhang suicide note sa kapulisan nga gisulat sa notebook.
Sa wala pa magpusil sa kaugalingon si Sabido nag-inom pa kini og ilimnong makahubog ug pagkahuman miadto siya sa ilang buwaran og kopras duol sa ilang balay ug didto nagpusil sa iyang tampihak.
Nakuhang ebidensya sa kapulisan ang armas nga gituohang gigamit ni Sabido nga may upat ka buhing bala ug usa ka kabhang sulod sa tambor niini. (BANATNEWS)