Naga gipasidunggan
CEBU, Philippines - Ang dakbayan sa Naga gihatagan og pasidungog sa mga private group industries isip outstanding Local Government Unit (LGU) tungod sa maayong pagpadagan niini sa ilang waste management program sa siyudad.
Ang Makati-based Federation of Philippine Industries Inc. (FPI) mihangop sa zero-waste program nga gipasiugdahan ni Mayor Valdemar Chiong.
Ang FPI gilangkuban kini sa 21 ka industry associates ug 70 ka mga corporate members, mipasidungog sa Naga ug sa Las Piñas City tungod sa “good waste management practices.”
Si Engineer Joveno Garcia, city planning and development officer sa siyudad maoy midawat sa plaque of recognition atol sa gipahigayong kalihukan sa paghatag og pasidungog niadtong Nobiyembre 24, 2011 sa Hotel Intercontinental Manila sa Makati.
Ang kanhi kalihim sa Department of Environment and Natural Resources (DENR) nga si Elisea Gozum kinsa karon climate change consultant sa administrasyong Aquino lakip sa panel of judges kinsa mi-assessed sa performance sa mga LGU. Ang major criteria sa FPI awardee mao ang saktong pamaagi sa paglabay sa basura ug ang maximization sa recyclable capability nga dili makadaot sa kalikupan.
Kahinumduman nga sa milabay’ng usa ka tuig ang siyudad sa Naga nakig-partner sa FDRCon Company Inc. nga usa ka pribadong kompaniya kinsa nagdumala, nag-operate ug nagmentenar sa lima ka ektaryang material recovery facility (MRF) diha sa barangay Pangdan, Naga.
Ang MRF facility sa Naga adunay bag-ong pamaagi sa solid waste disposal diin ang mga basura ma-convert ngadto sa energy o W2E nga nagsuplay og 10 metric tons nga alternative fuel nga giila sa refuse-derive fuel (RDF) ngadto sa planta sa ApoCemex diha sa barangay Tinaan. (BANATNEWS)
- Latest
- Trending
